„Кромберг и Шуберт“ е дел од глобалната групација Kromberg & Schubert, чија специјалност е производството на кабелски снопови за автомобилската индустрија, а во Македонија има две свои фабрики: во Битола и Скопје.

„Кромберг и Шуберт“ Битола со години наназад е дел од семејството на 200 НАЈГОЛЕМИ и НАЈУСПЕШНИ.

Фабриката во битолската индустриска зона „Жабени“ го започна производствениот процес во 2012 година, а десет години подоцна, компанијата го прошири производството и во 2022 година ја отвори својата втора фабрика во индустриската зона „Илинден“ во Скопје.

Во своето постоење од околу 13 години во нашата земја, „Кромберг и Шуберт“ е еден од најголемите работодавци во Македонија, со што придонесува за развојот на македонската економија, но и помага да се намали стапката на невработеност во земјата.

Со години наназад нашиот кадар има можност да работи на проекти наменети за автомобилски гиганти како Mercedes, Audi, Volkswagen, BMW, Škoda итн.

Оперативните процеси на компанијата вклучуваат четири деловни единици во производството на кабли, On-board мрежи, пластична технологија и мехатроника.

Во 2013 година, кога компанијата станала дел од семејството на 200 НАЈГОЛЕМИ И НАЈУСПЕШНИ, бројот на вработени изнесувал 620 лица, а 10 години подоцна, во 2023 година, „Кромберг и Шуберт“ значи сигурна егзистенција за 6.858 вработени, само во битолската фабрика.

Со години наназад, фабриката на овој германски гигант во Македонија е еден од најголемите работодавци во нашата земја, кој е препознатлив по тоа што води особена грижа за вработените во својата компанија.

Практиката на LEAN технологија – главен рецепт за поголема успешност во работењето

Отворањето на странските инвестиции во Македонија во голема мера значеше промена на условите за вработените и подобрување на условите за вработените во индустријата.

Така и фабриката „Кромберг и Шуберт“ даде голем придонес за развојот на индустриската култура во нашата земја.

Компанијата се води од мотото „Нашите луѓе се нашата најјака страна“, а во своето работење ја практикува т.н. LEAN методологија на работење, која е позната по тоа што има голем број позитивини страни.

Станува збор за системски пристап на подобрување на процесот на работење и минимизирање на трошоците, а е изграден на два клучни принципи: постојан напредок и почит кон луѓето.

Оригинално, овој концепт бил развиен од „Toyota“ во средината на 20-иот век, а денес се применува во голем број индустрии и компании.

Во таа насока, во компанијата постојано се води сметка за намалување на непотребното трошење време и ресурси, додека целиот процес е сконцентриран на целосно задоволство на клиентите преку посветеност во креирање на висококвалитетни производи и фокусираност на вработените.

Ваквиот начин на работење е една од причините зошто фабриката на „Кромберг и Шуберт“ и понатаму останува едно од најатрактивните места за вработување кај нас.

Дополнително, ако на тоа се додадат условите за работа што ги нуди компанијата во вид на редовни примања (кои често беа проблем во минатото во македонските индустриски капацитети), можност за напредок, осигурување на полно работно време, платен превоз и платен топол оброк, редовни бонуси за редовност и ефикасност, исплата на регрес од годишен одмор – станува јасно колкаво значење имаат странските инвестиции од ваков тип за развојот и промените во македонската индустриска култура.

Со ваквите стандарди на работење германскиот гигант се наметна како атрактивна компанија за работа во нашата земја и придонесе за значително подобрување на економската состојба во земјата.

Зголемен раст на приходите во 2023 година

Имајќи предвид дека посветените вработени секогаш може да креираат подобри резултати, воопшто не е чудо што компанијата цела деценија наназад е дел од семејството на најголемите и најуспешните компании кај нас.

Во 2023 година, компанијата се најде на 6. место на ранг листата на најголемите компании кај нас, а на 49. место на ранг листата на најуспешните.

„Кромберг и Шуберт“ во 2023 година остварила вкупен приход во износ од 21.688.754.079 денари и добивка пред оданочување од 371.175.103 денари.

Процентуално, во однос на вкупните приходи компанијата остварила раст од 40,82% во споредба со претходната 2022 година, а растот на добивката пред оданочување е за 30,32%.

Со овие бројки компанијата уште еднаш покажа дека и понатаму останува една од најстабилните компании кај нас, која во голема мера придонесува за развојот на македонската економија – како преку директно вработување на лица, така и преку соработка со голем број други македонски компании.