Во сектор каде конкуренцијата е интензивна, а потрошувачките навики постојано се менуваат, долгорочниот успех најчесто зависи од способноста компанијата да изгради доверба кај потрошувачите, стабилна мрежа на продажни локации и континуирано да се прилагодува на потребите на пазарот.

Според податоците од изданието 200 Најголеми и Најуспешни компании во Македонија 2025, базирани на финансиските резултати за 2024 година, РАМСТОРЕ Македонија остварил приход од 3,94 милијарди денари и се наоѓа на 75 место меѓу најголемите компании во државата. Добивката пред оданочување изнесува 56,5 милиони денари. Иако не се наоѓа меѓу најпрофитабилните компании, компанијата останува еден од препознатливите играчи во македонската малопродажба.

Рамстор е присутен на македонскиот пазар од 2005 година и денес располага со мрежа од 27 супермаркети во осум градови низ државата, како и онлајн продавница, што го позиционира меѓу поголемите организирани трговски синџири во земјата. Компанијата вработува околу 750 лица и континуирано инвестира во развојот на својата продажна мрежа и услугите кон потрошувачите.

Покрај својата основна трговска дејност, Рамстор во изминатите години развива активности насочени кон поддршка на локалната економија и одржливиот развој. Еден од примерите е организацијата на саемот „Вкусот на Македонија“, преку кој десетици мали и средни производители од руралните средини добиваат можност да ги претстават своите производи пред поширока публика и да остварат нови деловни контакти.

Во делот на квалитетот и безбедноста на храната, компанијата применува политики за одговорно снабдување и соработка со добавувачи кои ги исполнуваат меѓународните стандарди за безбедност и квалитет. Систематските контроли и ревизии на добавувачите претставуваат дел од пошироката стратегија за обезбедување сигурност и доверба кај потрошувачите.

Дополнително, преку активности како еко-маскенбалите и настаните организирани по повод Денот на планетата Земја, Рамстор работи и на подигнување на еколошката свест кај најмладите генерации, во соработка со партнери од јавниот и приватниот сектор.

Примерот на Рамстор покажува дека во современата малопродажба финансиските резултати се само еден дел од приказната. Подеднакво важни се стабилното присуство на пазарот, поддршката на локалните производители, безбедноста на производите и способноста компанијата да остане релевантен дел од секојдневието на потрошувачите. Во година кога компанијата одбележува две децении присуство на македонскиот пазар, нејзината улога во развојот на организираната трговија останува значајна.