НАЈПОЗНАТИ ВИНАРИИ ВО МАКЕДОНИЈА

Позната и како татковина на виното, Македонија е дом на повеќе винарии кои посветено ја продолжуваат со векови старата традиција на производство на вино. 

Најстарата винарска визба која постои уште од далечната 1885 година е Винарската визба Тиквеш која повеќе од еден век создава вина за сите свои љубители, со грозје од Тиквешкиот регион. Идеален поради својата положба, Тиквешкиот регион ги дава најквалитетните вина. Најпознат вински бренд на Тиквеш е црвеното вино Т'га за југ кое се добива од најмоќната црна винска сорта вранец. 

Сковин винарија својата приказна ја започнува во 1979 година, а денес ја раскажува низ 5 континенти и 18 држави. Вината на Сковин потекнуваат од Скопското виногорје, а најпознато е виното Марков Манастир кое го добива златниот медал на “Мундус Вини” а се произведува од винската сорта Вранец.

Винаријата Бовин е прва семејна винарија во Македонија, основана во 1998 година. Вкусот на вината од тиквешкиот регион Бовин ги пренесува во 30 држави на 5 континенти. Капацитетот за производство достигнува 1,5 милиони шишиња вино годишно.

Повеќе од 25 различни вина со карактеристичен вкус се дел од производните линии на Стоби винаријата. Сместена во Градско, во близина на античкиот град Стоби, од каде што и потекнува името, винарија Стоби обработува лозја на 13.000 хектари земја. Најпознато е виното Вранец. 

Основана во 2004 година, оваа модерна винарија со нови пристапи на производство на вино, ги комбинира традицијата и технологијата за да добие вина со врвен квалитет. Винаријата Камник сместена на 17 хектари во Вардарската Долина во скопскиот вински регион е местото каде се одвива целата магија на создавање вина од светски ранг.