Во анализата подолу ги прикажуваме 10те најголеми извозни дејности како и која дејност е најзастапена помеѓу овие 100 компании. 

Како што може да се види од табелата, најголеми приходи од извоз на производи имаат остварено компаниите кои се занимаваат со производство на други делови и дополнителен прибор за моторни возила. Извозот во рамките на оваа индустрија, во износ од 153,9 милијарди денари, зафаќа 39% од вкупно остварените приходи од страна на 100те најголеми извозници, кој изнесуваше 394,2 милијарди денари. Иако бројот на компании не е голем и се работи за приходи остварени од само 3 компании од оваа дејност, сепак учеството е значително високо. 

Втора дејност со најголем извоз е Трговија на електрична енергија со вкупно извезени 42,3 милијарди денари или 11% од вкупните приходи. Тука веќе станува збор за повеќе компании кои се дел од дејноста, поточно 8. Значително помал процент, 4%, имаат извезено компаниите за Производство на електрична и електронска опрема за моторни возила и за Трговија на големо со цврсти течни и гасовити горива и слични производи. Приходите во рамки на овие дејности се 17,5 милијарди денари и 16,2 милијарди денари, соодветно. 

Ако ја погледнеме втората табела, која се однесува на тоа која дејност беше најзастапена во вкупниот извоз на најголемите извозници, ситуацијата се менува. Како најзастапена дејност се јавува Трговијата на електрична енергија со 8 компании во нејзини рамки. Потоа следи Трговијата со автомобили и моторни возила од лесна категорија со 5 компании и 6,8 милијарди денари учество во вкупните приходи на 100те најголеми извозници. Со ист број на компании, но нешто помал износ на приходи е третата дејност Компјутерско програмирање, а по неа следи Производство на готови текстилни производи освен облека. Тука се вбројуваат 4 компании со вкупни приходи од 4,9 милијарди денари. 

Петтата дејност на оваа листа, со само 3 компании, е всушност прва на претходната листа и е за Производство на други делови и дополнителен прибор за моторни возила. Погледнете ја целосната анализа на табелите во прилог, додека другите податоци може да ги најдете овде.