Од 2003 година КАМ маркет е дел од листите на 200 најголеми и најуспешни компании

КАМ ДОО е најголем национален хард-дисконт на нашиот пазар, а воедно и лидер во малопродажбата во Македонија за што говорат и податоците од 200 НАЈГОЛЕМИ И НАЈУСПЕШНИ според кои КАМ маркет го завзема 10тото место на листата на најголеми компании и 1вото место во својата дејност.

КАМ маркет во моментов своите активности ги извршува во 80 продавници низ цела Македонија, на принципот на хард-дисконт. Зад нивниот успех стои внимателно избран асортиман од над 1700 производи, од кои над 600 се од приватни трговски марки. Концептот на хард-дисконт се покажа како многу успешен низ годините, а на компанијата и донесе голем успех и брз развој во 24те години од нејзиното постоење. Освен што делува на македонскиот пазар, од 2016 КАМ е присутен и на пазарот на Косово и Бугарија.

Од 2003 година КАМ маркет е дел од листите на 200 најголеми и најуспешни компании, а дека секоја година е се поуспешна за нив, може да се заклучи од фактот дека во последните 4 години се и една од највисоко рангираните компании во првите 10 според вкупен приход. Графиконите подолу покажуваат дека вкупните приходи се во постојан пораст, а во 2022 година се за 24,07% поголеми од 2021. Во однос на успешноста, КАМ маркет е втор најуспешен маркет рангиран на 49тото место на листата според добивка пред оданочување.

2022 година КАМ ја затвори со зголемен број на вработени во однос на претходната година, а бројот на просечно вработени изнесуваше 1144 луѓе.

Со својата лидерска позиција, КАМ редовно добива и бројни награди и признанија за разни аспекти на работењето, а не заостанува ни во делувањето на полето на општествена одговорност во чие име компанијата редовно одвојува средства за разни донации за помош и поддршка на ранливите категории на граѓани и локалната заедница.