СТЕНТОН ГРАДБА - компанија што успешно ги претвора предизвиците во можности

Последните неколку години се време кога градежниот сектор во Македонија се соочува со сериозни предизвици: сериозен недостиг на квалификувана работна сила, раст на цените на градежните материјали, инфлаторни притисоци и сè поголеми барања за квалитет и рокови на изведба.

А кога ќе се земат предвид финансиските показатели објавени во рамки на проектот 200 НАЈГОЛЕМИ И НАЈУСПЕШНИ, јасно е дека СТЕНТОН ГРАДБА ДОО, Оризари – Битола, успева да ги надмине сите овие предизвици и да ја задржи својата позиција меѓу најголемите и најуспешните компании во државата.

Во изминатите две децении компанијата прерасна во еден од препознатливите носители на домашното градежништво и горд член на листата на топ македонски компании.

Преку континуирани инвестиции во современа механизација, развој на човечките ресурси и реализација на бројни инфраструктурни, индустриски и градежни проекти, СТЕНТОН ГРАДБА е позитивен пример за градежна компанија која успеа да изгради стабилен деловен модел кој овозможува раст и во периоди на економска неизвесност.

Градежништвото е една од индустриите што најдиректно ги чувствува економските промени. Зголемувањето на цените на суровините, енергенсите и транспортот, недостигот на стручен кадар и променливата динамика на јавните и приватните инвестиции се фактори што значително влијаат врз работењето на компаниите.

Сепак, финансиските резултати на СТЕНТОН ГРАДБА покажуваат дека со добро планирање, ефикасно управување и навремени инвестиции може да се обезбеди континуитет и стабилен развој.

Финансиски показатели што ја потврдуваат стабилноста

Во податоците за 2024 година СТЕНТОН ГРАДБА се пласираше на 179. место меѓу најголемите компании во Македонија и на 119. место меѓу најуспешните компании, со што уште еднаш ја потврди својата позиција во домашната економија.

Компанијата работела со просечно 188 вработени, а во текот на годината остварила вкупни приходи од 1.400.731.705 денари.

Добивката пред оданочување достигнала 168.165.422 денари, што претставува уште една година на позитивно финансиско работење.

Особено значаен е растот на приходите, кој во споредба со претходната година изнесува 24,15 проценти.

Во услови кога градежниот сектор функционира под постојан притисок од растечки трошоци и недостиг на работна сила, ваквиот резултат претставува показател за зголемен обем на работа и успешно реализирани проекти.

Истовремено, зголемената добивка пред оданочување од 5,9 проценти, покажува дека компанијата успеала да ја задржи профитабилноста и покрај зголемените оперативни трошоци. Иако растот на добивката е поумерен од растот на приходите, тоа е сосема очекувано, ако се земе предвид дека станива збор за сектор кој во последните неколку години е „на удар“ и се соочува со значително повисоки цени на материјалите, горивата, транспортот и работната сила.

Пресметано според финансиските резултати, добивката пред оданочување претставува околу 12 проценти од приходите, што е солидно остварување, ако се земе предвид дека станува збор за компанија што работи во градежната индустрија, каде профитните маржи често се под силен притисок.

Градежништвото останува еден од двигателите на економскиот раст

Во изминатата деценија на сите им стана јасно дека градежниот сектор има далеку поголемо значење од самата изградба на објекти.

Тој претставува еден од најважните двигатели на економскиот развој бидејќи директно влијае врз повеќе индустрии – од производството на градежни материјали, транспортот и машинската индустрија, до трговијата, финансискиот сектор и услугите.

Секоја нова инвестиција во патишта, мостови, индустриски капацитети, станбени и деловни објекти создава нова економска вредност и отвора можности за ангажман на голем број компании и работници. Затоа состојбата во градежништвото често се смета за еден од најважните показатели за економската активност во една земја.

Во Македонија, 2024 година беше период на продолжување на повеќе инфраструктурни проекти, но и година во која компаниите мораа да работат во значително посложени услови отколку пред неколку години.

Недостигот на квалификувана работна сила останува најголемиот предизвик

Покрај растот на цените на материјалите и оперативните трошоци, најголемиот проблем со кој се соочуваат градежните компании е недостигот на квалификувана работна сила.

Според проценките на стопанските организации и претставниците на градежниот сектор, на македонскиот пазар недостигаат повеќе од 12.000 квалификувани градежни работници.

Овој проблем не е специфичен само за Македонија, туку е присутен и во повеќето земји од регионот.

Во последните години дел од компаниите се обидуваат да го ублажат недостигот преку ангажирање странски работници. Сепак, практиката покажува дека голем дел од нив Македонија ја гледаат како привремена дестинација пред заминување во земјите од Европската Унија, каде условите за работа и платите се значително повисоки.

Таквата состојба дополнително ја зголемува конкуренцијата за квалификуван кадар и ги принудува компаниите постојано да вложуваат во подобрување на условите за работа, обука на нови работници и задржување на постојниот персонал.

Успехот не зависи само од бројот на работници

Во вакви околности и услови, успешноста на една градежна компанија повеќе не се мери исклучиво според бројот на реализирани проекти.

Сè поголемо значење имаат организацијата на работниот процес, ефикасното користење на ресурсите, инвестициите во механизација и способноста навремено да се исполнат барањата на инвеститорите.

Примерот на СТЕНТОН ГРАДБА покажува дека добро организираното работење, дисциплината во реализацијата на проектите и континуираното инвестирање во развојот на компанијата можат значително да го намалат влијанието на недостигот од работна сила.

Истовремено, компанијата настојува да ги диверзифицира своите активности и да учествува во различни видови градежни проекти, со што обезбедува поголема стабилност и намалување на ризиците поврзани со промените на пазарот.

Инвестициите во механизација носат конкурентска предност

Современото градежништво бара постојано технолошко унапредување. Новата механизација и современата градежна опрема овозможуваат побрза реализација на проектите, подобар квалитет на изведбата и поголема безбедност при работа.

Во услови кога квалификуваните работници стануваат сè потешко достапни, инвестициите во современа механизација претставуваат една од најважните конкурентски предности.

Таквите вложувања овозможуваат повисока продуктивност, поефикасно искористување на ресурсите и намалување на времето потребно за реализација на проектите, што е особено важно кај големите инфраструктурни инвестиции.

Значаен економски фактор во Пелагонискиот регион

Како компанија со седиште во Оризари, Битола, СТЕНТОН ГРАДБА има значајно влијание врз економскиот развој на Пелагонискиот регион.

Со речиси две децении успешно работење, компанијата не само што обезбедува стабилни работни места, туку придонесува и за развојот на локалната економија преку ангажирање домашни добавувачи, транспортни компании, подизведувачи и други деловни партнери.

Истовремено, реализацијата на инфраструктурни и градежни проекти има пошироко значење за регионот, бидејќи подобрената инфраструктура создава услови за полесно движење на луѓето и стоките, привлекување нови инвестиции и развој на локалното стопанство.

Компанијата отвора работни позиции не само во Пелагонија, туку и во сите региони каде што ги реализира своите проекти, со што нејзиното економско влијание се чувствува и надвор од матичниот регион.

Позиционирана за понатамошен развој

Финансиските резултати за 2024 година покажуваат дека СТЕНТОН ГРАДБА успешно ги надминува предизвиците што ги носи современото градежништво.

Растот на приходите од над 24 проценти, позитивното работење и задржаната профитабилност се показател дека компанијата располага со стабилен деловен модел и со капацитет да продолжи со развојот и во наредните години.

Во услови кога градежниот сектор останува една од најважните стопански гранки, а инфраструктурните инвестиции продолжуваат да бидат значаен двигател на економскиот раст, компаниите што инвестираат во луѓе, технологија и организација на работењето ќе имаат најголеми можности за понатамошен напредок.

Со континуираното присуство меѓу 200 НАЈГОЛЕМИ И НАЈУСПЕШНИ компании во Македонија, СТЕНТОН ГРАДБА уште еднаш потврдува дека претставува еден од стабилните носители на домашното градежништво и компанија која успешно ја гради својата иднина врз основа на искуство, квалитет и долгорочна развојна визија.