Врвните вина кои се резултат на совршениот спој на земјата, небото, сонцето, најдоброто грозје од тиквешкиот регион и најсовремената технологија и знаење на винските мајстори, гордо го претставуваат „Тиквеш“ и Тиквешкиот регион, кој уште од 1885 година е симболот на вековната винска традиција во Македонија.

ВВ Тиквеш од 2009 година речиси секоја година е редовен учесник во едицијата 200 Најголеми и Најуспешни. Забележаа успешни резултати за 2022 година, и тоа со раст во вкупниот приход и во вкупната добивка пред оданочување. Раст во приходот е забележан од 40,5% и раст во добивката пред оданочување од 26,5%. Заедно со тоа рангирани беа на 99 место на најголеми и на 76 место на најуспешни компании за 2022 година.

Во рамките на одбележувањето на 130-годишнината, во 2015 година, ВВ „Тиквеш“ отворила дигитален музеј посветен на уметноста на создавањето врвно вино во Македонија. Фотографиите и информациите кои го сочинуваат дигиталниот музеј се достапни на интернет страната на Тиквеш.

Во ноември 2018 година, ВВ „Тиквеш“ се проширила и на меѓународниот пазар преку преземање на француската винарија „Château de Gourdon“ формирајќи ја заедничката бренд-платформа „Tikveš Châteaux & Domaines“.

Во „Тиквеш“ се обидуваат во нивните вина да прикажат сè што нашите сликари и музичари се стремеле да прикажат во нивната уметност.

Пред скоро време Винарија Тиквеш учествуваше на SuperWine, најпрестижниот вински настан во Југоисточна Европа, во Buddha-Bar Beach Porto Montenegro, кој ги собра водечките винарии и љубители на вино од регионот и пошироко.