Се чини дека оваа година помеѓу 10те компании кои вработуваат најмногу луѓе се еднакво застапени домашните и странските директни инвестиции. Како што можеме да видиме од табеларниот приказ подолу низ текстот, првата компанија со најголем број на вработени е странската Кромберг и Шуберт Македонија Бт ДООЕл, која минатата година имала просечен број на вработени од дури 6270 лица.

После неа следи ДММ Дрекслмајер Мануфактуринг, која е исто така една од странските директни инвестиции, со број на вработени од 6213 лица. Трета на листата, а прва домашна компанија која се вбројува како една од најголемите работодавци е АД ЕСМ, Скопје каде што во 2022 година работеле 4258 лица. ЕСМ воедно е и најуспешната компанија помеѓу 10те најголеми работодавци, рангирана на 4то место според добивката пред оданочување во 2022 година.

Повторно се враќаме на странските компании, односно Амфенол Технолоџи од Кочани е 4та на листата со 2535 вработени. Приближен број на вработени имала и следната компанија Гентерм Северна Македонија со 2322 лица. 

Понатаму следи Алкалоид АД со 1965 вработени, Јавното Претпријатие Национални Шуми со 1921 вработени, а 8то место на листата го зазема Макпетрол АД со 1914 вработени која исто така е и најголемата компанија во анализава, со ранг на 4то место според вкупниот приход во 2022 година. 

На листата се најде и Никоб ДОО од Скопје која се занимава со услуги за заштита со помош на сигурносни системи и која вработува 1827 лица. 

За крај, последната компанија е Адиент Сеатинг од Штип со 1676 вработени чија дејност е производство на текстилни производи за моторни возила.